СҚО дәрігерлері адам өлімін жасырған
Сурет: Zakon.kz
«Қазақстан» ұлттық телеарнасы таратқан ақпаратқа сай, Солтүстік Қазақстанда ана өліміне қатысты қылмыстық іс қозғалды. Былтыр Тайынша ауданының 35 жастағы тұрғыны Әйгерім Қазезова бесінші баласын дүниеге әкеліп, бірнеше аптадан кейін облыстық ауруханада коронавирустан қайтыс болған.
Бірақ дәрігерлер ананың өлімін тіркемей, құжат бойынша мәйітті тірі адам ретінде Тайынша аудандық ауруханасына жіберген. Қағаз жүзінде ол бір ай емделді делініп, дәрі-дәрмегіне қыруар қаржы жұмсалған.
Дәрігерлер мәйітті ешқандай құжатсыз марқұмның туған-туыстарына берген. Әйелдің қайтыс болғаны туралы анықтама тек бір айдан кейін ғана жасалған. Осылайша дәрігерлер адам өлімін жасырып қалған.
Телеарнаның хабарлауынша, былтыр Солтүстік Қазақстанда 3 ана қайтыс болды.
Облыстық денсаулық сақтау басқарма басшысы Нұрлан Аймановтың айтуынша, әйелдің дүние салуы ана өлімі ретінде тіркелсе, министрлік тарапынан тексеріс болады.
Сондықтан қайтыс болу туралы анықтама қағазы бір айға кеш датамен жасалған. Аурухана жетекшісі осылайша жауапкершіліктен қашпақ болған. Тайынша аудандық аурухананың бас дәрігері Анатолий Рафальский қызметінен босатылды.Нұрлан Айманов
