Елімізде 2 миллионға жуық оқушы жазғы мектепті аяқтады

жазғы мектеп оқушылары, сурет - Zakon.kz жаңалық 17.06.2022 16:25

Сурет: Оқу-ағарту министрлігі

Жазғы мектептердің жұмысы 26 мамыр мен 17 маусым аралығында ұйымдастырылды. Жазғы мектеп оқушылардың білімін нығайтып, олқылықтардың орнын толтыруға мүмкіндік берді. Биыл мұндай оқуға бітіруші 9, 11-сынып оқушыларынан басқа барлық оқушы ерікті түрде қатысты, деп хабарлайды Zakon.kz.

Қазақстандық оқушылар жазғы мектептердегі оқуын аяқтады. Барлығы 3,6 млн оқушының 2 миллионға жуығы жазғы мектепте білім алды. Балалар мен олардың ата-аналарының қалауы бойынша 38 мыңнан астам оқушыға жеке пәндер бойынша сабақтар ұйымдастырылды.

Оқушылар сабақтарға дүйсенбіден жұмаға дейін қатысты. Оқу «Математика», «Қазақ тілі», «Ағылшын тілі», «Физика», «Химия» және тағы басқа негізгі пәндер бойынша өтті.

Оқу-ағарту министрлігінің хабарлауынша, балаларды ынталандыру мақсатында сабақ стандартты формада емес, бағалаусыз өткен.

Оқу кестесіне музейлерге саяхат, экскурсиялар, іскерлік ойындар, шеберлік сабақтары, фильмдер мен мультфильмдерді талқылау кірді. Кітап клубтары, дискуссиялар, стратегиялық сессиялар, дебаттар және басқа да форматта сабақтар ұйымдастырылды. Жазғы мектептің қорытындысы бойынша ата-аналардың оң пікірлерін алдық, – деді Мектепке дейінгі және орта білім беру комитетінің төрағасы Гүлмира Кәрімова.

Жазғы мектеп аяқталған соң мұғалімдер жыл сайынғы еңбек демалысына шығады. Демалыс 42 күннен 56 күнге дейін ұзартылған.

Оқи отырыңыз