Марқұмның атынан құрбан шалуға бола ма

Қазақстан мұсылмандары діни басқармасының Шариғат және пәтуа бөлімі қайтыс болған кісінің атынан құрбан шалуға болатын-болмайтынын айтты, деп хабарлайды Zakon.kz.

Шариғат және пәтуа бөлімі мамандарының сөзінше, дүниеден озған адамның (марқұмның) атынан сауап ниетінде құрбан шалуға болады. Бірақ мойнына құрбан шалу уәжіп болған кісі ең әуелі өз атынан құрбандық шалуға тиіс.

Әли (Алла оған разы болсын) біреуін өзі үшін, екіншісін Пайғамбарымызға (оған Алланың салауаты мен сәлемі болсын) атап екі құрбандық шалған. Бұның себебін сұраған кісілерге ол: «Алланың елшісі (оған Алланың салауаты мен сәлемі болсын) кеудемде жаным бар кезде өзі үшін құрбандық шалуымды өсиет еткен», – деп жауап берген.

Өлген адам үшін құрбан шалғысы келген адам оны құрбан айт күндері орындауы шарт. Құрбандық етінен құрбан шалған адамның өзі де, басқалар да жесе болады.

Егер құрбан шалуды қайтыс болған адам өсиет етсе, құрбандық етін оның мұрагерлері жей алмайды. Құрбандықты түгелдей кедей мен мұқтаждарға таратып беру керек.