Президент Шымкент қаласының жұртымен кездесті
Сурет: akorda.kz
Жергілікті жұртшылық алдында сөйлеген сөзінде Президент Шымкентті еліміздегі табиғаты да, тұрғындарының ықылас-пейілі де ерекше ыстық жердің бірі ретінде атап өтті.
Қазақ руханиятында Шымкент шаһарының орны бөлек. Бұл – ұлт дәстүрінің берекелі бесігіне айналған қала. Сондай-ақ қазақы қасиет пен ыстық ықыластың символы. Бұл – үздік мәдениет пен ұлттық этикеттің тоғысқан жері. Ұлыларды ардақтау, үлкенді сыйлау – сіздердің басты ұстанымдарыңыз. Шымкент – ұлтымыздың өсіп-өнген, көктеп-көбейген мерейлі мекені. Сондықтан мен шырайлы қаланың халқын Жерұйығын тапқан жұрт деп сеніммен айтамын, – деді Қасым-Жомарт Тоқаев.
Мемлекет басшысы Қасым-Жомарт Тоқаев Шымкент туралы мынадай деректерге тоқталды:
▪️ Шымкентті дамытуға 170 миллиард теңге қаржы бөлінді;
▪️ 1,5 триллион теңгеден астам инвестиция тартылды;
▪️ қала бюджеті 4 есе өсті;
▪️ қаладағы өнеркәсіп өнімі 65 пайызға артты;
▪️ аумағы 2,5 миллион шаршы метрден асатын тұрғын-үй салынды;
▪️ соңғы жылдары шағын және орта бизнестің жалпы өңірлік өнімдегі үлесі 40 пайызға жетті, осы салада 180 мыңға жуық адам жұмыс істейді;
▪️ соңғы кезде шаһарға іргелес жатқан 41 елді-мекен қосылды;
▪️ инженерлік инфрақұрылымның қуатын арттыруға 4 жылда республика бюджетінен 135 миллиард теңгеге жуық қаржы бөлінді;
▪️ жылдың соңына дейін 15 мың тұрғыны бар Құрсай аумағына ауыз су жеткізіледі;
▪️ Шымкентте 5 жылдың ішінде 101 мектеп салу жоспарланған;
▪️ қалада соңғы екі жылда 50 жекеменшік мектеп ашылды.
