Өзбекстанда сотталған 20 қазақстандық елге қайтарылады
Сурет: pixabay
Бастаманы іске асыру үшін екі ел арасында бірнеше жыл келіссөз жүргізілген. Ал құжат қабылданбас бұрын шекаралас мемлекеттердің миграциялық процесі мен қылмыстық ахуалы сарапталған, деп жазады Almaty.tv.
«Ұсынып отырған шарт өзара құқықтық көмек көрсету негіздері мен тәртібін, оларды жүзеге асыру жолдарын, куә сарапшы мен айыпталушы шақырту, олардан жауап алу, күзетпен ұсталып отырған адамдарды уақытша алдыру және басқа мәселелерді реттейді», – деді ҚР Бас прокурорының орынбасары Әсет Шыңдалиев.
Сондай-ақ Сенат Қазақстан мен Франция арасындағы құқықтық көмек көрсету тәртібін де белгіледі. Жоғары палата отырысында қос елдегі қылмыстық істер бойынша өзара құқықтық көмек туралы заң қабылданды. Құжат бойынша тергеу амалдарын жүргізу, тінту сияқты іс-шаралар ескерілген. Алайда, қылмыстық іс бойынша күдікті, куәгер немесе жәбірленуші шетелде тұрып жатқан болса, еліміздің құқық қорғау органдары өздігінен сол мемлекетке барып, тергеу әрекетін жасай алмайды. Бас прокурор орынбасары Әсет Шыңдалиевтың айтуынша, тергеп тексеру әрекеті тек сол мемлекеттің заңнамасына сәйкес жүргізілетінін жеткізді.
