Петропавлда балтамен шабуылдаған бала сыныптастарын бірнеше күн бұрын телефон арқылы қорқытқан

Петропавл, сурет - Zakon.kz жаңалық 17.02.2023 23:23

Сурет: astanatv.kz

Петропавлда мектепте балтамен шабуылдаған оқушы сыныптастарына бірнеше күн бұрын телефон арқылы қоқан-лоққы көрсеткен. Ата-аналар бұл туралы әлеуметтік желіде жазба жариялады, деп хабарлайды Zakon.kz.

Олардың айтуынша, бала бірнеше күн бұрын бір оқушының үстіне қасақана шай төккен. Ал алдыңғы бейсенбіде сыныптастарына ақ масканың фотосын жіберіпті. Үш күннен кейін ол дәл сол масканы киіп, оқушыларға балтамен шабуыл жасаған.

Қазір бұл мектепте осындай тағы бірнеше бала оқып жатқан көрінеді. Сондықтан ата-аналар балаларының қауіпсіздігіне алаңдап отыр. Бұл туралы "Астана" телеарнасы хабарлады.

"Ол балаға ешкім тиіскен емес. Ол өз бетімен жүрді. Ал балаларға телефонмен түрлі нәрсені жібергенде жауапты тұлғалар сол кезден бастап оны жіті назарға алу керек еді. Ата-аналар ақыл есі өзге балаларды бөлек оқыту керек деп есептейді. Қазір біз балаларымызды мектепке жіберуге қорқып отырмыз". Ата-ана Надежда Шушемоина

Ал құзырлы орган және мектеп әкімшілігі бұл іске қатысты тергеу жүріп жатқандықтан, әзірше қандай да бір ақпарат бере алмайтынын айтқан.

Оқи отырыңыз