Енді сенімхаттың барлық түрін онлайн форматта eGov Mobile арқылы рәсімдеуге болады
Сурет: primeminister.kz
11 сәуірде Әділет министрлігі ЦДИАӨМ-мен бірлесіп, азаматтарға нотариаттық қызметтер алуды айтарлықтай жеңілдетуге мүмкіндік беретін «Цифрлық нотариат» жаңа жобасын таныстырды. Қазақстан нотариаттық қызметтің осы түрін цифрлық форматқа ауыстырған әлемдегі алғашқы мемлекеттердің бірі болды. Бүгінде онлайн режимде тек Франция мен Литвада ғана сенімхатты нотариалды куәландыруға болады.
Бұрын сенімхатты рәсімдеу кезінде құжатқа қол қою және нотариустың куәландыруы үшін клиенттің келуі талап етілген. Енді нотариаттық сенімхат азаматтарға eGov Mobile арқылы қолжетімді болып отыр. Ал болашақта бұл қызмет бірқатар банк қосымшасында пайда болмақ. «Цифрлық сенімхат» онлайн режимде клиент пен нотариустың бейнебайланысы арқылы рәсімделеді. Бұл қызметті өтініш берілген сәтте бос кез келген нотариус көрсете алады.
Цифрлық сенімхатты барлық мемлекеттік органда немесе талап етілген ұйымдарда қағаз құжат сияқты ұсынуға болады. Ал қауіпсіздікті қамтамасыз ету мақсатында eGov Mobile қосымшасына кіру кезінде де, өтінімге қол қою кезінде де пайдаланушының биометриялық деректерін қолдана отырып, ЭЦҚ пайдаланылады.
Цифрлық сенімхатты алу үшін:
- eGov Mobile қосымшасына кіру;
- өтінішті толтырып, оған ЭЦҚ арқылы қол қою;
- мәліметтерді растау үшін қосымшадан нотариусқа бейнебайланыс арқылы қоңырау шалу;
- белгіленген тариф бойынша нотариус қызметін төлеу;
- «Цифрлық құжаттар» бөлімінде цифрлық сенімхатты алу керек.
Жоба Мемлекет басшысының тапсырмасы бойынша Үкіметтің «цифрлық» бастамалары аясында (сондай-ақ Digital Justice жобалар портфелі шеңберінде) Әділет, Цифрлық даму, инновациялар және аэроғарыш өнеркәсібі министрліктері және Республикалық нотариаттық палатамен бірлесіп іске қосылды.
