Бокстан ӘЧ-2023: Санатәлі Төлтаев 1/16 финалда қарсыласына жол беріп қойды
Сурет: Instagram/boxingkazakhstan
63,5 келіге дейінгі салмақ дәрежесіндегі 1/16 финалда Санатәлі Төлтаев Маврикий елінің боксшысы Ришарно Колинмен қолғап түйістіріп, төрешілердің шешімімен Африка өкіліне жол берді. Осылайша, әлем чемпионатында екінші боксшымыздың меселі қайтты.
3 мамырда төрешілердің даулы шешіміне сай, 60 келіге дейінгі салмақ дәрежесінде өнер көрсеткен Талғат Сырымбетов те жарыс жолынан шығып қалған болатын. Ол үш раунд бойы қарсыласын төпелеумен болды, бірақ төреші 2022 жылғы Азия чемпионы, иорданиялық Абужаджехо Мұхаммедтің қолын көтерді.
4 мамырда әлем чемпионатының кешкі сессиясында тағы бір боксшысымыз өнер көрсетеді. 1/16 финалда 92 келіден астам салмақ дәрежесінде біздің құрама көшбасшыларының бірі, Олимпиада ойындарының жүлдегері Қамшыбек Қоңқабаев шаршы алаңға шығады. Ол ресейлік боксшы Алексей Дроновпен қолғап түйістіреді. Бұл жекпе-жектің басталуы: Астана уақыты бойынша сағат 21: 00-ден кейін.
