Алтын дән-2022: Қызылордада үздік шаруалар автокөлік мінді
Сурет: Қызылорда облысы әкімінің баспасөз қызметі
Астықты өлкедегі Сыр елінің шаруалары биыл су тапшылығының қиындықтарына қарамастан мол өнім алды. Диханшылар 188 500 гектар жерге егін егіп, оның ішінде негізгі дақыл күріштің әр гектарынан 56,7 центнерден өнім алды.
Біздің облыс еліміздің күрішке деген қажеттілігінің 90 пайызын өтеп келеді. Жыл сайын экспортқа 100 мың тонна көлемінде күріш шығарылуда. Мемлекет басшысының қолдауымен Сырдария өзенінің жоғары ағысында орналасқан мемлекеттер арасындағы келіссөздер нәтижесінде су көлемі былтырғы деңгейден көбейді. Бұл ретте диқан қауымның ұсыныс-тілектерін ескере келе, Президентіміздің пәрменімен күріш егісі көлемін 78 600 гектар көлемінде қалдырдық. Даланың дана диханы Ыбырай Жақаев "егініне қарап - қырманы, күтіміне қарап - түсімі" деген. Күрделі жағдайға қарамастан күріштің әр гектарынан 70 центнерден аса өнім алған "Ақтөбе и К", "Жаңажол", "Абзал и К", "Мағжан и К", "Ақжарма и К", "Ақжарма - 1" жауапкершілігі шектеулі серіктестіктерін ерекше атап өтуге болады. Сондай-ақ, күріштің әр гектарынан 90-100 центнерден өнім алған күрішші-звеноводтарымызды мақтан тұтамыз. Қамбамыз дәнге, қорамыз малға толып, халқымыздың құт-берекесі арта берсін! Қызылорда облысы әкімі Нұрлыбек Нәлібаев
Сурет: Қызылорда облысы әкімінің баспасөз қызметі
Сыр дихандары осы жылы күріш егуді жылдағыдан ерте 15 сәуірде бастап, 10 қазанға дейін аяқтады.
Өңірде суды үнемдеу мақсатында Қазалы ауданында жаңбырлатып суару тәсілімен 87 гектар жерге жүгері егілсе, алғаш рет түрік компаниясымен бірлескен құны 13,8 млрд.теңге болатын қызанақ пастасын өндіретін зауыт салынады. Өндіріс жылына 24 мың тонна қызанақ пастасын шығарады.
Қызылорда облысы әкімінің баспасөз қызметінің мәліметінше, биыл аймақта бақша өнімдерін егуге басымдық берілді. Облыс әкімінің тапсырмасы аясында ірі шаруашылықтар егіс егуге ынталы ауыл халқына 10-15 гектардан жер дайындап, 6802 отбасы 1833 гектарға өнім еккен.
Салтанатты шарада ауыл шаруашылығы саласына елеулі үлес қосқан қос қайраткер Жарылқасын Шәрiпов пен Имамзада Шағыртаев "Қызылорда облысының Құрметтi азаматы" атанды. Сондай-ақ, "Алтын дән" шарасында бірқатар сала қызметкері облыс әкімінің "Құрмет" грамотасы, ҚР Ауыл шаруашылығы министрлігінің "Еңбек ардагері" медалі мен "Ауыл шаруашылығы саласының үздігі" төсбелгісімен марапатталды.
Сурет: Қызылорда облысы әкімінің баспасөз қызметі
Ал, жыл қорытындысымен топ жарған озаттар түрлі номинация бойынша сыйлық иеленді.
Салтанатты шарада облыс әкімі "Мағжан и К" ЖШС үздік қызметкерлеріне "Lada Vesta" жеңіл автокөлікін сыйға тартса, "Жаңажол", "Ақжарма и К" қожалықтарына "Lada Granta" тұлпарын табыстады. Ал, "Таң ЛТД" ЖШС мен "Ақжар" шаруа қожалығы озат жұмысшылары "Chevrolet" автокөлігін мінді.
Сурет: Қызылорда облысы әкімінің баспасөз қызметі
Аудандар арасында "Ауыл шаруашылығы өнімдерін өңдеу саласы" номинациясы бойынша Қазалы ауданы марапатталса, "Мал шаруашылығы" саласында Арал ауданы үздік болды. Сондай-ақ, "Егін шаруашылығы" номинациясында Шиелі ауданы жеңімпаз атанды, ал "Агроөнеркәсіп кешенін дамытуда ең жоғарғы көрсеткіштерге қол жеткізген үздік аудан" атағы Сырдария ауданына бұйырды.
Құрмет төрінен орын алған еңбеккерлер арасында озат шопан, бақша өсіруші, күріш өсіруші, комбайншы, агроном, бригадир арнайы алғысқа кенелді.
Сурет: Қызылорда облысы әкімінің баспасөз қызметі
Мерекелік кеш концерттік бағдарламаға ұласты. Сыр елінің сахна жұлдыздары дала еңбеккерлерінің құрметіне әуезді ән айтып, мерекені думанға бөледі.
Айта кетейік, ертең диқаншылар жиған өнімдерін тоқшылық мерекесі жәрмеңкеге апарады. Сырбойылықтар 1000 тонна өнімді базар бағамынан 15-20 пайыз төмен бағада ала алады.
