ҚР СІМ: 553 қазақстандықтың Украинадан шығуына көмек көрсетілді
Сурет: Zakon.kz
ҚР СІМ Қазақстан азаматтарын Украинадан эвакуациялау туралы соңғы деректермен бөлісті. Оған сәйкес, бүгінге дейін 553 адам эвакуацияланды, оның ішінде:
Польшаға – 526 адам;
Молдоваға – 21 адам. Молдовадан Румынияға 9 адам шықты, оның ішінде 7 адам Қазақстанға ұшып кетті, 2 азамат Бухаресттегі ҚР елшілігімен қонақ үйге орналастырылды;
Мажарстанға – бес адам;
Словакияға – бір адам.
Бүгінгі таңда «Air Astana» әуе компаниясының үш эвакуациялық ұшақтарымен Қазақстанға 432 адам қайтарылды.
Қазір төртінші эвакуациялық ұшақты жіберу бойынша жұмыс жүргізілуде. Рейс Катовице қаласында (Польша) азаматтардың қажетті санының жиналуына қарай жүзеге асырылады.
Қазақстандық дипломаттар жоғарыда аталған мемлекеттердің шекарасынан өтуді, азаматтарды жинауды және орналастыруды, сондай-ақ Қазақстанға одан әрі жөнелтуді қамтамасыз етуде. Айта кететін жәйт, осыған дейін Украинадан шыққан бірқатар отандастар Еуропалық Одақ аумағында қалуға шешім қабылдады.
Қазіргі уақытта Катовице қаласында 30 ҚР азаматы бар, Украина-Польша шекарасында 30 жолаушысы бар тағы 1 автобус өз кезегін күтуде. Львовтағы ҚР Құрметті консулдықтың жанындағы эвакуациялық жинау нүктесінде 9 адам, Киевтегі ҚР Елшілігінде – 10 адам, Харьковта – 7 адам бар. Киевтегі ҚР Елшілігі штаттық режимде жұмысын жалғастыруда. ҚР СІМ баспасөз қызметі
«Атамекен» ҰКП ақпаратына сәйкес, Украинадағы әскери әрекеттер басталғаннан кейін сол елдің аумағында 47 жүргізуші – ҚР азаматтары және 8 жүргізуші – шет мемлекеттердің азаматтары бар жалпы 55 бірлік автокөлік қалып қалды.
Қазіргі уақытта ҚР шет елдердегі мекемелерінің тікелей көмегімен және араласуымен 55 автокөлік құралдарының 31-і шықты, оның ішінде:
Ресейге – 11;
Молдоваға – сегіз;
Польшаға – 12.
Қалған 24 автокөлік Украина аумағында қалып қойды.
ҚР СІМ жүргізушілермен байланыс орнатқан, олардың тізімдері өзектендірілді, автокөліктің орналасқан жері нақтыланды. Жүк тасымалдаушылардың тұрған жеріне байланысты ҚР тиісті шетелдік мекемелеріне автокөлік құралдарын эвакуациялау бойынша тапсырмалар берілді. Осы бағыттағы жұмыс жалғасуда.
