Түрікменстанда Гурбангулы Бердімұхамедовтің сәйгүлігіне ескерткіш орнатылады

Түрікменстанның Ахал уәлаятында Гурбангулы Бердімұхамедовтің атақты Ақханына ескерткіш орнатылады, деп хабарлайды Zakon.kz.

Халықтың ұлттық мақтанышы – ақалтеке жылқыларының даңқын арттыру мақсатында Түрікменстан президенті Ахал уәлаятының хякимлігіне жеке кәсіпорынмен атақты Ақханның мүсіні бар ескерткішті жобалау және салуға келісім-шарт жасасуға рұқсат беретін қаулыға қол қойды, – деп жазды «Туркменистан сегодня» басылымы.

Мақалада ескерткіштің құрылысы 2022 жылғы мамырда басталып, 2022 жылғы желтоқсан айында толық дайын күйде тапсырылуы тиіс екені жазылған.

«Хроники Туркменистана» ақпараттық агенттігінің жазуынша, Ақхан атты сәйгүлік жұрт назарына 2017 жылдан бастап ілінді. Сол жылы Ақханды ауыздықтаған шабандоз V Азия ойындарының алауын жақты.