Калифорнияда кроссовер 25 полицейді қағып кетті

Колифорния, жол-көлік оқиғасы, полицей, сурет - Zakon.kz жаңалық 17.11.2022 13:17

Сурет: видеодан скриншот

Американың Лос-Анджелес қаласында Honda CR-V көлігі таңертең жүгіріп келе жатқан полиция қызметкерлерін қағып өтті. Салдарынан 25 адам зардап шекті, бесеуінің жағдайы ауыр, деп хабарлайды Zakon.kz.

Көлік рөлінде 22 жастағы жігіт болған. Полиция капитаны Чарли Сэмпсонның айтуынша, күдікті Миллс-авенюмен оңтүстік бағытта кетіп бара жатып, қарсы жолаққа шығып кетіп, топ болып жүгіріп келе жатқан полиция қызметкерлерін қағып өткен, деп жазды FOX 11.

Зардап шеккендер ауруханаға жеткізілді. Барлығы 25 адам зардап шекті: 16-сы жеңіл, 4-еуі орташа, 5-еуі ауыр жарақат алды.

Көлік жүргізушісі қамауға алынды. Оның аты-жөні жарияланған жоқ. Жол-көлік оқиғасы кезінде ол көлікпен жұмысқа бара жатқан. Қазір полиция мән-жайды анықтап жатыр.

Жол-көлік оқиғасы болған сәт бейнебақылау камерасына жазылған.

Оқи отырыңыз