Ташкенттіктерге суықтан аман шығуға әскерилер, Ішкі істер министрлігі және Ұлттық гвардия көмектесіп жатыр
Сурет: Қорғаныс министрлігінің баспасөз қызметі
16 қаңтар күні кешке Қорғаныс министрлігі Ташкенттің барлық ауданы мен елдің бірқатар облыстарында асханасы бар шатырлар құрды. Ол жерден тұрғындар ыстық тамақты тегін алып, жылынып, мобильді құрылғыларды қуаттай алады. Ұлттық ұлан мен Ішкі істер министрлігі де Ташкентте тәулік бойы жұмыс істейтін шатырлардың ұйымдастырылғаны туралы хабарлады. Бұл туралы Gazeta.uz жазды.
Мирабад ауданындағы Биродарлик махалласында бесінші күннен бері жарық пен газ жоқ. Кейінгі күндері ауа температурасы минус 15 градусқа дейін және одан да төмен түсті.
"Бесінші күн жарық пен газ жоқ. Су қатып тұр. Мен 78 жасымда мұндайды көрген емеспін. Жылыну үшін тон киіп күн астында жүремін, себебі бөлмедегі температура - 8-10 градус. Үйде тамақ жасамаймыз. Көршім канистрмен су әкелді, маған бөлісті. Дәретханаға бару үшін күндіз қарды ерітемін. Жарайды біз үлкенбіз, бірақ балаларды аяймын."Ташкент қаласының тұрғыны
№147 мектептің жанындағы әскери шатырда сарбаздар отын жарып, пеш қыздырып, су қайнатып, палау әзірлеп жатыр. Тұрғындар шатырдың айналасына жиналды.
Бабур ауданындағы көршілес Яккасарай ауданында да шатырлар бар. Алдыңғы түнде электр жарығы өшіп қалды. Тұрғындар пештің жанына жиналып, печенье қосылған шай ішіп, әңгімелесіп, палау күтті.
Шатырдың жанында көшеде әскери оркестр ойнап тұрған.
Ішкі істер министрі Пулат Бобожонов астананың бірқатар аудандарын аралап, электр желілеріндегі ақауды жою жұмысымен танысты. Бес аудан Ішкі істер министрлігі мен Ұлттық ұланға бекітілген.
Ұлттық ұлан да азаматтарды тамақтандыру және жылыту үшін шатырлар тіккен. Олардың кейбіреулерінде теледидар бар. Қала тұрғындарына психологиялық қолдау көрсету үшін шатырларда арнайы жабдықталған автобустар кезекшілік етіп жатыр.
