Францияда зейнетақы мәселесі бойынша референдум өткізу жөніндегі өтініш тағы қабылданбады

Францияның Конституциялық кеңесі (КК) зейнеткерлік жасты 62 жасқа дейін шектеу мәселесі бойынша референдум өткізу туралы қайталама өтінішті қабылдамады, деп хабарлайды Zakon.kz.

BFM телеарнасының мәлімдеуінше, ұсынысты солшыл партияның өкілдері әзірлеген. Олардың бірінші өтініші де 14 сәуірде қабылданбаған еді.

Дегенмен, партия мүшелері берілер емес, заң жобасы 8 маусымда қаралады.

Солшыл партия өкілдері Францияда сәуір айының ортасында қабылданған зейнет жасын 62-ден 64-ке көтеру туралы заңның күшін жоюды талап етіп отыр. Ол заң осы жылдың күзінде күшіне енуі керек.

Соған байланысты елде наразылық шерулері өтіп жатыр, 1 мамырда зейнетақы реформасына қарсы митинг кезінде полиция қызметкерлері жарақат алды.