Кишинев әуежайында оқ жаудырған шетелдік құрықталды

Кишинев қаласындағы әуежайда белгісіз ер адам айналаға оқ жаудырды. Жергілікті полиция мәліметінше, кем дегенде екі адам қаза тапты, деп хабарлайды Zakon.kz.

Молдова Республикасы ІІМ мәліметінше, қазіргі уақытта оқ жаудырған қаскөй ұсталған. Ол - жаралы.

Құзырлы ведомство атысты ұйымдастырушы әуежайдан елге кіргізілмей қойған шетелдік екенін, оның Түркиядан ұшып келгенін нақтылайды.

БАҚ-тағы мәліметтерге сәйкес, оқиға орнында кем дегенде екі адам оққа ұшқан. 

Оқыс оқиғаға байланысты ғимараттан жолаушылар эвакуацияланып, рейстер уақытынан кешігуге мәжбүр болған.