Қазақстан қандай елдермен еркін сауда жасауға келіспек
Сурет: Zakon.kz
Арман Шаққалиев бірқатар елмен еркін сауда аймағы туралы келісім жасау жоспарда бар екенін айтты.
"Бүгін, 25 желтоқсанда Жоғары Еуразиялық экономикалық кеңес отырысы аясында мемлекет басшылары Иранмен еркін сауда туралы келісімге қол қоюды жоспарлап отыр. Сингапурмен де осындай келісімге қол қойылды. Қазір мемлекетішілік процедуралар болып жатыр. Мысыр, Индонезия және БАӘ елдерімен еркін сауда аймағын құру бойынша жұмыс істеліп жатыр", - деді министр.
Арман Шаққалиевтің айтуынша, Қазақстан Сербиямен, Вьетнаммен және (қысқартылған форматта) Иранмен өзара еркін сауда режимінде жұмыс істейді. Нәтижесінде Вьетнаммен тауар айналымы жеті жылда 2,5 есеге (525,7 млн долларға дейін), Иранмен үш жылда 38%-ға (521 млн долларға дейін), Сербиямен келісім бір жылда үш есеге (73,8 млн долларға дейін) өскен.
"ЕАЭО елдерінің сатып алуларға өзара қолжетімдігін қамтамасыз ету үшін шамамен 450 тауар позициясы (17 сала) бойынша өнеркәсіптік өңдеудің жалпы критерийлері әзірленді. Шығу тегі СT-1 сертификатымен расталған тауарлардың тізбесі кеңейтілді. Бұл Қазақстанның серіктес елдер нарығына экспортын жыл сайын 100 миллиард доллардан астам ұлғайтуға көмектеседі. Елімізді ЕАЭО-ның логистикалық хабы, еуразиялық өнеркәсіптік ынтымақтастық орталығы ретінде құру үшін Қазақстан тарапынан бастамалар әзірленіп жатыр", - деді Арман Шаққалиев.
Сонымен қатар интеграциялы инфрақұрылымды жобалар аясында "Солтүстік-Оңтүстік" шығыс халықаралық көлік дәлізін дамыту, Дарбаза-Мақтаарал теміржол желісін және Қазалы-Арыс учаскесінде екінші теміржол рельстерін салу бойынша жұмыс істеліп жатыр.
Бұған дейін ТМД елдерінің тауар айналымы 20,6 млрд долларға жеткені хабарланған еді.
