Димаш Құдайберген Нью-Йоркте ресейлік композитор Игорь Крутойдың мерейтойлық концертінде өнер көрсетіп, көрермендердің зор қошеметіне бөленді. Димаш осы концерттің сахна артында түсірілген видеосын Инстаграм-дағы парақшасына жүктеді, деп хабарлайды Zakon.kz.
Видеода сахнада ән салып, ішке оралған Димашты A'Studio тобының мүшелері, Николай Басков, Дима Билан қарсы алып, оны құттықтады. Барлығы оған өздерінің ілтипатын білдіріп, мадақтарын айтты.
Ал Димаштың өзі Ирина Аллегроваға гүл сыйлады. Өз кезегінде ресейлік әнші Нью-Йорктегі концерттен кейін Димаш туралы көп нәрсені түсінгенін айтып, оған бар жақсылықты тіледі.
Желідегілердің бірі ресейлік бір топ эстрада жұлдызы қатысқан бұл концерт туралы былай деп жазды:
"Көрермендер тып-тыныш отырады да бір уақытта шу ете түседі, тағы да тыныштық орнайды да, одан соң бір уақытта бәрі орнынан тұрып қол шапалақтайды. Соған қарағанда оның бәрі тек Димашты көруге келген секілді".
31 қазанда кешке Димаш Құдайберген "Вечерний Ургант" бағдарламасына қатысып, сұқбат береді. Оны Ресейдің Бірінші арнасынан көруге болады.