ҚР ЭМГР Экологиялық реттеу және бақылау комитетінің басшысы Зулфухар Жолдасов Орталық коммуникациялар қызметінде өткен брифингте Нұра өзенінің сынаппен ластануы тарихи құбылыс екенін, бұл мәселені шешу үшін көп жыл бойы жұмыс жүргізіліп жатқанын айтты.
"Бұрын сынаппен ластану ТЭМК кәсіпорнының (Теміртау электрометаллургиялық зауыты) аумағынан су тасқыны кезеңінде таралып, ол коллектор арқылы тазарту қондырғыларына түскен. Жабдықтың шлам шөгіндісі де, коллектор да сынаппен ластанған. Кәсіпорынның мәліметінше, бүгінде олар бұл коллекторды басқармайды, суды басқа жолмен жібереді. Осыған сәйкес коллектордан және тазарту қондырғыларынан сынапты шаймалау бүгінде локализацияланған".Зулфухар Жолдасов
Оның айтуынша, қазір Қарағанды облысындағы су өлшемдеріндегі сынаптың концентрациясы осыдан 10-12 жыл бұрынғыдан төмендеген. Дегенмен сынап ағынды суларды тазарту қондырғыларында және "ТЭМК" АҚ коллекторында әлі күнге дейін шламда қалып отыр. Қарағанды облысындағы экологиялық проблемаларды шешудің "Жол картасы" қазірдің өзінде бекітілген, оған сәйкес жергілікті билік мәселені түпкілікті шешу үшін шаралар қабылдауға тиіс.