Азаматтық авиация комитетінің мәліметінше, Алматыдан ұшып шығу сағат 08:00-ге жоспарланған. Тель-Авивтен ұшып шығу уақыты – жергілікті уақыт бойынша 12:50.
"Air Astana компаниясының мәліметінше, қазір Тель-Авив әуежайымен рейстің ұшып келу және ұшып кету уақыты келісіліп жатыр".Азаматтық авиация комитеті
Сонымен қатар барлық сұрақты +7 (727) 244 44 78 (қоңырау шалуға) және +7 702 702 0074 (WhatsApp) телефондары арқылы хабарласып, қою керек екені айтылды.
Израиль мен Палестина арасындағы қақтығыс 7 қазан күні таңертең шиеленісті. ХАМАС Израиль аумағына мыңдаған зымыран атқылаған. Израиль бұған жауап ретінде "Темір қылыштар" операциясын бастады.
Бүгінде Қазақстанның Израильдегі елшілігінің консулдық есебінде 77 адам тұр. Оған елшілік қызметкерлері мен олардың отбасы мүшелері де кіреді. Қазақстаннан бес студент Израиль университеттерінде білім алып жатыр, ал 30-ға жуық қазақстандық Израильдің түрлі медицина мекемелерінде – барлығы 112 адам тағылымдамадан өтіп жатыр.
