Америка президенті CBS News арнасына берген сұхбатында Таяу Шығыстағы жағдай туралы сөз қозғады. Ол палестиналық ХАМАС-тың Израильге жасаған шабуылын "жабайылық" деп атап, Израиль армиясының жауап қайтаруға толық құқығы бар екенін атап өтті. Сонымен бірге ол қақтығыстың өршуіне Газа секторының бейбіт тұрғындары емес, "бейбіт тұрғындардың артына тығылып отырған" ХАМАС жауапты екенін атап өтті.
Байден сонымен қатар Израильді Газа секторын басып алудан және Палестина жерлерін аннексиялаудан сақтандырды.
"Менің ойымша, бұл зор қателік болар еді. ХАМАС экстремистері Палестина халқының атынан шығып отырған жоқ. Сондықтан Израильдің Газаны қайта басып алуы қателік болар еді. Солтүстікте "Хезболла" экстремистері мен оңтүстігінде ХАМАС тобын жою – бұл міндетті шарт...Бірақ Палестина билігі болуы керек. Палестина мемлекетін құру жолы боуы керек". Джо Байден
АҚШ президенті де Газа секторынан бейбіт тұрғындарды эвакуациялау және бейбіт тұрғындарға гуманитарлық көмек жеткізу үшін гуманитарлық дәліз ашуды талап ететінін нақтылады. Бұған қоса ол Иранды палестиналық-израильдік қақтығысқа араласпауға шақырды.
"Мен Газа секторындағы жазықсыз адамдар медициналық көмекке, су мен азық-түлікке қол жеткізу керек деп есептеймін", – деді Джо Байден.
Бұған дейін АҚШ-тың мемлекеттік хатшысы Энтони Блинкен де ХАМАС Палестина халқының мүддесін білдірмейтінін баса айтқан еді.
