2023 жылғы 6 сәуірде ҚР Премьер-Министрінің бірінші орынбасары Роман Склярдың төрағалығымен жанар-жағармай (ЖЖМ) нарығындағы ахуал бойынша кеңес өтті, деп хабарлайды Энергетика министрлігінің баспасөз қызметі.
Жалпы еліміз бойынша дизель отынының жиынтық қоры 308,56 мың тоннаны құрайды, бұл 2023 жылғы 1 қаңтардағы қормен салыстырғанда 59 мың тоннаға артық.
Сонымен қатар кейбір өңірлерде жекелеген жанармай құю станцияларында дизель отынын сатуда шектеулер байқалады.
Осыған байланысты ЖЖМ ішкі нарығын қамтамасыз ету үшін:
- Өңірлік штабтарға (ЖАО, БҚДД, МКД, ЭТД, ТМРД) жанар-жағармайдың жасанды тапшылығын тудырмау мақсатында өңірлік мұнай базаларын комиссиялық тексеру жөнінде шаралар қабылдау;
- Бұзушылық фактілері болған жағдайда тиісті мемлекеттік органдарға нарық субъектілерінің бәсекелестікке қарсы немесе доминантты әрекеттері бойынша тергеу жүргізу тапсырылды.
ЖАО – жергілікті атқарушы органдар;
БҚДД – бәсекелестікті қорғау және дамыту департаменттері;
МКД – мемлекеттік кірістер департаменттері;
ЭТД – экономикалық тергеу департаменттері;
ТМРД – табиғи монополияларды реттеу департаменттері.
Алдында Энергетика министрі жанар-жағармай бағасын өсіруге түрткі тағы бір себепті атаған болатын.