The Daily Galaxy басылымының жазуынша, 1930 жылы неміс археологы Гюнтер Рёдер Рамсес II-нің алып мүсінінің төменгі бөлігін тапқан. Содан бері мүсіннің қалған бөліктері іздестірілгенімен, нәтижесі болмаған.
Ал 2024 жылдың қаңтарында зерттеушілер тобы мүсіннің топырақ астында, бетін төмен қаратып жатқан жоғарғы бөлігін анықтады.
Қазба жұмыстарына Боулдердегі Колорадо университетінің филология кафедрасының доценті Ивона Трнка-Амрейн және Мысырдың Туризм және көне мұра министрлігінің өкілі Басем Гехад жетекшілік етті.
Алайда фрагментті топырақтан шығарғаннан кейін де ғалымдар нақты не тапқанын бірден анықтай алмады. Ніл өзеніне жақын орналасуына байланысты тас тығыз шөгіндіге айналған болуы мүмкін. Табылған жәдігердің бірегейлігін растау үшін көптеген зерттеу жүргізілді.
Мүсіннің артқы бағанындағы Рамсес II-нің патшалық атақтары жазылған иероглифтер және бұған дейін табылған бөлікпен салыстыру арқылы жәдігердің түпнұсқалығы расталды.
Табылған фрагменттің биіктігі төрт метрге жуық. Онда қос тәж киген, бас киімінің үстінде патшалық кобра бейнеленген отырған перғауын бейнеленген. Егер мүсіннің екі бөлігі біріктірілсе, оның жалпы биіктігі шамамен жеті метрге жетеді.
Қазір археологтар мүсіннің екі бөлігін біріктіру мүмкіндігін қарастырып жатыр.
Бұған дейін Финляндияның оңтүстігінде әуесқой археолог ел аумағынан бұрын-соңды табылмаған викингтер дәуіріне тиесілі ең ірі күміс тиындар көмбесін қазып алғаны хабарланған.