Әлихан Смайылов шетелден қайтарылған заңсыз шығарылған активтердің жаңа сомасын жариялады.
"Бас прокуратураның мәліметінше, қазірдің өзінде жалпы сомасы 945 млрд теңге активтер қайтарылды. Оның ішінде шетелден 600 млн долларға жуық қаражат қайтарылды және бұл жұмыс жалғасып жатыр", - деді министрлер кабинетінің басшысы.
Оның айтуынша, Қазақстанда заңсыз активтерді қайтару туралы арнайы заң қабылданып, Бас прокуратура жанынан арнайы комитет және премьер-министр басқаратын арнайы комиссия құрылды.
"Комиссия құрамына бірқатар басшы, соның ішінде құқық қорғау органдары, парламент депутаттары мен белгілі қоғам қайраткерлері кірді. Комиссияның құрамы құпия емес, ол жарияланады. Ол бәріне қолжетімді. Тізімге келсек, оны жарияламаймыз. Себебі біздің заңнама бойынша кінәсіздік презумпциясы бар. Сондықтан мұндай тізілімді жариялау адамның кінәсі әлі дәлелденбесе де, кінәлі дегенді білдіруі мүмкін. Сондықтан тізім жабық. Бірақ капиталды қайтару бойынша жұмыстың қорытындысы туралы тиісті ақпаратты береміз", - деп қорытындылады премьер-министр.
24 шілдеде Қазақстанда заңсыз алынған мүлікті мемлекетке қайтару туралы заң күшіне енді.
13 қазанда Қазақстанға 850 миллиард теңгеден астам қаржы қайтарылғаны хабарланды.