50 отбасы 5 жыл бойына тегін пәтерде тұруға мүмкіндік алды. Ондағы коммуналдық шығын мен жалдамалы пәтер ақысын кәсіпкерлер өздері көтереді. Осылайша, әлеуметтік санаттағы отбасыларға жағдайын күйттеп алғанша өз баспаналарына ақша жинауға мүмкіндік туып отыр.
Барлығы 50 отбасыға арналған екі қабатты үйдің құрылысы 3 жыл жүрген. Әлеуметтік жоба толықтай кәсіпкерлердің қолдауымен жүзеге асқан. Олар тек үй салып берумен ғана шектелмей, алдағы уақытта азық-түлік пен киім-кешекпен де көмектесетінін айтады.
Әкем үйсіз-күйсіз жүрген жандарды бұрын үйімізге әкеліп бағатын, біреулерден сондай отбасылар екен десе, соларды үйге әкеліп, көмектесетін. Менің әкем – соғыс ардагері. Біз де мұқтаж жандарға көмек беруді жөн көрдік. Ол бізге бұрыннан қанымызға сіңген қасиет, ата-бабаларымыз әрдайым жұртқа қамқор болған екен.Кәсіпкер Мәриаш Серікбайқызы
Жоба жетекшілерінің айтуынша, үй толықтай тұрғындар меншігіне өткізілмейді. Сонымен қатар баспана арнайы комиссияның тексеруінен өтіп, жағдайы өте төмен отбасыларға ғана беріледі. Бүгін арнайы комиссия қарауынан өткен 6 отбасыға пәтер кілті табысталды. Екі бөлмеден тұратын, барлық жиһаздармен жабдықталған және жуыну бөлмесі бар пәтерлерге жақын арада өзге тұрғындар да шетінен қоныстанады.
