Ақмола облысы ПД Есірткі қылмысына қарсы іс-қимыл басқармасы қызметкерлерінің жедел ақпараты бойынша, 30 жастағы елорда тұрғыны аса ірі мөлшерде Астана, Павлодар, Солтүстік Қазақстан және Ақмола облыстарына мефедрон және тұз синтетикалық есірткілерін жеткізумен және өткізумен айналысқан, деп жазады Polisia.kz.
12 қазанда Ақмола полицейлері арнайы бөлімшелер қызметкерлерінің көмегімен арнайы операция нәтижесінде Көкшетау қаласына кіреберіс жолда, “Құлагер” қонақ үйінің жанында Астана қаласының 30 жастағы тұрғынының басқаруындағы автокөлікті тоқтатты.
Жоғарыда аталған автокөлікті рұқсатсыз тінту барысында капоттың астынан: сарғылт түсті, ұнтақ консистенциялы, ерекше иісі бар, мөлдір скочпен оралған бір үлкен полиэтилен байламы (шамамен 200 грамм мефедрон), сондай-ақ қызыл және сарғылт түсті ұнтақ затты (салмағы шамамен 150 грамм) қара түсті изолентамен оралған 256 бума табылып, тәркіленді.
Сонымен қатар, есірткі жасырылған орындар фиксацияланған екі ұялы телефон тәркіленді.
Қазіргі уақытта жедел уәкілдер есірткі сатып алу арнасын анықтау бойынша іс-шаралар жүргізуде.