Атырау облысы әкімінің бұрынғы орынбасары Бақытгүл Хаменоваға "алдын ала келісім бойынша пара алды" деген айып тағылды. Облыстық мәдениет басқармасының бұрынғы басшысы Ақылбек Рысқалиев те осы баппен айыпталған-ды.
Үшінші айыпталушы "Балқыту" ЖШС директоры Өміртай Адамовқа "мемлекеттік қызметтерді орындауға уәкілетті тұлғаға ірі көлемде пара берді" деген айып тағылды.
2021 жылғы 11 желтоқсанда Атырау облысы әкімінің орынбасары Бақытгүл Хаменова ұсталғаны белгілі болды.
2021 жылы 12 желтоқсанда Хаменова үйқамаққа алынды. Сот оның "жалғызбасты әйел" екенін, екі бала тәрбиелеп отырғанын, біреуі бала кезінен мүгедек екенін, бұрын сотты болмағанын, құзырлы органдардан жасырмағанын ескерді.
2021 жылғы 23 желтоқсанында Хаменова уақытша ұстау изоляторына қамалды.
Бақытгүл Хаменова облыс әкімінің орынбасары болып 2020 жылғы наурыз айында тағайындалды.