Polisia.kz-тің хабарлауынша, оқиға кеше, 8 сәуірде 18:30 шамасында болған.
"Метро" сауда үйінің жанындағы екі көшенің қиылысында жүргізушісі басқаруынсыз автобус қарсы бағытқа шығып кетіп, жаяу жүргінші жолағында келе жатқан 6 адамды қағып кеткен. Салдарынан екі әйел мен жасөспірім оқиға орнында және кәмелетке толмаған қыз жансақтау бөлімінде көз жұмды. Тағы екі адам ауруханада жатыр".
Шымкент полиция департаментінің жедел-тергеу тобы жүргізуші соңғы аялдамадан қарсы бағытқа бұрылып, автобусты қол тежегішінде қалдырып, көліктен шығып кеткенін анықтады.
ҚР Қылмыстық кодексінің 345-бабының 4-бөлігі бойынша сотқа дейінгі тергеу басталып, автобустың жұмысқа жарамдылығын тексеру үшін автотехникалық сараптама тағайындалған. Жүргізуші уақытша ұстау изоляторына қамалды.
Otyrar.kz-тің хабарлауынша, жол апатынан кейін Шымкент клиникалық ауруханасына жеткізілген 2005 жылғы тұрғынның жағдайы орташа ауыр. Ол нейрохирургия бөлімшесінде жатыр.
Оқиға орнына барған 4-жедел жәрдем бригадасы зардап шеккендерге алғашқы медициналық көмек беріп, науқастарды жақын маңдағы ауруханаларға жеткізген.
Нақтырақ айтқанда, зардап шеккендер облыстық балалар ауруханасына, перинаталдық орталыққа және қалалық клиникалық ауруханасына жеткізілген.
