Бұған дейін Алматы мен оңтүстік облыстарда АИ-95 маркалы бензин тапшылығы бар деген ақпарат пайда болған. Дегенмен, Ерлан Ақкенженов бүгінде өндіріс пен тұтыну теңгерімі бір-біріне сәйкес келетінін айтты: елімізде 80 мың тонна АИ-95 бензині тұтынылатын болса, осыншама жанармай өндіріледі.
"Шымкент мұнай өңдеу зауытында оқыс оқиға болды", бүгінде ол тек АИ-92 бензинін шығаруға бағытталған. Қазан айында 95 бензин болатынын білеміз – бұл Шымкент мұнай өңдеу зауытында жүргізіліп жатқан жөндеу жұмыстарына байланысты. Енді оңтүстік өңірлерді қамтамасыз ету Атырау және Павлодар мұнай өңдеу зауыттарының қуаттары есебінен жүзеге асырылуда", - деді ол.
Оның айтуынша, үзілістер бірқатар себептермен байланысты болуы мүмкін. Соның бірі – ішкі туризмді дамыту.
"Аумағы бойынша еліміз тоғызыншы орында, аумағымыз үлкен, сондықтан еліміздің батысынан оңтүстігіне тасымалдау белгілі бір уақытты алады, біз ҚТЖ-мен күн сайын жұмыс істейміз. Тасымалдау бойынша ҚТЖ-ға ешқандай түсініктеме жоқ. Үзілістер АИ-95 тұтынудың шарықтау маусымымен байланысты және біз оны негізінен демалыс күндері байқаймыз. Себебі, мұнай базалары демалыс күндері жұмыс істемейді, яғни жанармай таситын көліктерге құйып, жанармай құю бекеттеріне жеткізуге мүмкіндік жоқ. Бұл да демалыс күндері мұнай базаларының жанар-жағармайға ілеспе шот-фактураларды рәсімдеуге мүмкіндігінің жоқтығы. Сондай-ақ біз ішкі туризмнің – Қапшағай су қоймасы, Балқаш пен Алакөлдің артқанын байқаймыз", - деді вице-министр.
Жалпы, оның айтуынша, АИ-95 маркалы бензин қоры 19 күнге жетеді. Сонымен қатар, биыл 40 мың тонна АИ-95 әкелінуі тиіс.
"Қазіргі уақытта тиісті келісім-шарттар жасалды, біздің "ҚазМұнайГаз" ұлттық компаниясының еншілес компанияларымен импорт тамыз айында жүзеге асырылады. Алғашқы импорт шамамен 19 мың тоннаны құрайды, бұл бір-екі ай болуы мүмкін. Жалпы, қазан айында біз Шымкент мұнай өңдеу зауытының нысандарында АИ-95 шығара бастаймыз", - деп түйіндеді сөзін Ерлан Ақкенженов.
2 тамызда Энергетика министрі Қазақстанға АИ-95 маркалы бензин Ресейден әкелінетінін хабарлады.
18 шілдеде "ҚазМұнайГаз" ҰК" АҚ басқарма төрағасының орынбасары Дмитрий Макеев Астанада өткен баспасөз мәслихатында еліміздегі кейбір жанар-жағармай құю бекеттерінде АИ-95 маркалы бензиннің жетіспеушілігіне қатысты пікір білдірді.