Ермек Маржықпаевтың айтуынша, жалпы, кейінгі 3 жылда 133 кәсіби спортшының қанынан тыйым салынған препарат табылған.
Бұған елімізде спорттық фармакология саласының кенже дамуы себеп дейді ведомство басшысы. Өйткені спортшылар спорттық тағамды өз бетінше сатып алып, жөн-жосықсыз қолдана береді, деп жазады qazaqstan.tv.
Сондықтан бұл мәселені заң аясында реттеп, жүйелі жұмыстар атқару қажет, дейді министр.
"Қазіргі таңда еліміз бойынша екі жоғары оқу орнында ғана жылына 45-ақ студентті спорт саласындағы медицина маманы ретінде дайындап шығарады. Осы олқылықтың орнын толтыру мақсатында Денсаулық сақтау министрлігімен бірлесе отырып, спорт саласына бейімделген психолог, фармаколог, нутрициолог сияқты салалық мамандарды дайындайтын факультет ашпақпыз." Ермек Маржықпаев, ҚР Туризм және спорт министрі
Демек бұл факультеттер медициналық жоғары оқу орындарыннда ашылады. Одан бөлек Елордада Ұлттық спорт университеті де салынып жатыр. Жалпы, республика бойынша алдағы екі жылда 113 спорт нысаны жаңадан бой көтеріп, 26-сы жөнделеді.
