Елордалық полиция департаментінің мәліметінше, жәбірленуші оларға белгілі бір әйел Қытайдан арзан бағаға тауар жеткіземін деген желеумен оның 14 миллион теңге ақшасын жымқырып кеткені туралы арызбен келген.
"Жедел іздестіру шаралары барысында Алматы облысының криминалдық полиция басқармасының қызметкерлері интернет-ресурс арқылы алаяқтық жолмен ақшалай қаражатты иемденіп кеткен 32 жастағы күдіктіні анықтады. Жас келіншек әлеуметтік желіде өзін Қытайдан жеткізудің қолайлы шарттарын ұсынатын жүк тасымалдаушы компания ретінде көрсетіп, жалған парақша ашқан", — деп хабарлады полиция.
Күдікті жеткізу үшін толық алдын ала төлемді сұрап, ақшаны алғаннан кейін бірнеше ай бойы тауардың кешігуі туралы айтып, бірте-бірте тұтынушылармен байланысын тоқтатқан.
Белгілі болғандай, әйелге қатысты бұған дейін жеті қылмыстық іс қозғалған, жалпы шығын көлемі 50 миллион теңгеден асады.
Алаяқ кінәсін мойындады.
2024 жылдың қарашасында біз қазақстандықтарға Қытайдан тауар жеткізуге байланысты алаяқтықтың жаңа түрі пайда болатыны туралы ескерткен болатынбыз.