Браконьерлер Жарасу ауылы маңындағы Іле — Қапшағай су қоймасы жағалауында ұсталды. Mitsubishi Pajero автокөлігін тексеру кезінде полиция қызметкерлері 121 келі әртүрлі балық салынған екі қапты тәркіледі. Сондай-ақ Қытайда өндірілетін, тыйым салынған 100 метрлік ау құралдары мен үрлемелі резеңке қайық тәркіленді.
"Анықталғандай, 38 және 37 жастағы азаматтар уылдырық шашу кезеңіне белгіленген тыйымды елемей, су биоресурстарын заңсыз аулап, экожүйеге елеулі залал келтірген. Алдын ала есеп бойынша мемлекетке келтірілген шығын 568 973 теңгені құрады. Ұсталған азаматтарға қатысты қылмыстық іс қозғалды", - деп хабарлады табиғатты қорғау полициясы.
Полиция уылдырық шашу кезеңінде балық аулауға қатаң тыйым салынатынын еске салады. Бұл шара су биоресурстарын сақтау және қалпына келтіру мақсатында енгізілген. "Уылдырық" жедел-профилактикалық іс-шарасы өңір бойынша жалғасып, браконьерліктің анықталған барлық фактілері қатаң түрде жойылатының ескертеді.