Салдарынан, аймақта аяқ асты болған мал терісі тау боп үйіліп, шіріп жатыр. Дәл осылай жүн қабылдайтын жерді де іздеп таппайсыз. Сорақысы өңірде жылына 3 млн бас қойдың жүні қоқысқа айналып, далаға төгіледі, деп жазады qazaqstan.tv.
Үсенбек Мұқанов 25 жылдан бері мал терісін қабылдаумен айналысады. Енді адал кәсібін алдағы аз күнде түбегейлі тоқтатпақ. Өйткені халықтан қабылдаған өнімді өткізетін кәсіпорын жоқ. Тері өндірісі тұралағанына тура 10 жыл болғанымен, биыл тіпті құлдырап кетті дейді.
"Мынау жинаған 25 тонна теріміз, бостан босқа үйіліп жатыр. Ешкімге керегі жоқ, кәдеге жарамай ысырап болды. Шамамен 5-6 млн теңге жайынан жатыр ғой осы жерде." Үсенбек Мұқанов, кәсіпкер
Кезінде 2-3 мың теңгеге бағаланған қой терісі қазір 10 теңгеге татымайды, сиырдан сыпырылғаны 400 теңгеге құлдыраған.