Министрдің айтуынша, жыл басынан бері ауыл шаруашылығы өнімдерінің экспорты өсім көрсетіп отыр – бұл өсім егін шаруашылығында да, мал шаруашылығында да байқалады.
"Егін шаруашылығы бойынша ақшалай мәнде өсім 51%-ды құрады. Негізгі өсім дәстүрлі өнімдер бойынша байқалды: бидай – 56%, күнбағыс майы – 76%, мал азығы – 152%, арпа – 94% және зығыр тұқымы – 60%. Мал шаруашылығында өсім 27% болды", – деді Арман Шаққалиев.
Оның айтуынша, бұл бағыттағы стратегиялық бағдар – ТМД және Қытай секілді дәстүрлі нарықтарды кеңейту, сондай-ақ Еуропа, Таяу Шығыс және Оңтүстік-Шығыс Азияның болашағы бар нарықтарына шығу.
Осы мақсатта биыл ЕАЭО мен БАӘ және Моңғолия арасында еркін сауда туралы келісімдерге қол қойылды. Сондай-ақ ЕАЭО мен Индонезия арасында еркін сауда келісімін жасасу жоспарланып отыр.
"Қазіргі таңда 2026-2028 жылдарға арналған май-тоң май өнеркәсібін дамыту жол картасы әзірленуде. Мақсат – майлы дақылдар секторын жаңа деңгейге көтеру, өндірісті арттырып, қуаттарды толық жүктеу. 2028 жылға қарай бұл салада жылдық айналымды 1 миллиард доллардан асырып, Қазақстанды күнбағыс майын жеткізетін әлемдегі үш ірі елдің қатарына енгізу жоспарланып отыр", – деді Сауда министрі.
Бұған дейін Атырау облысында ірі қара малға белгісіз бір індет келгенін жазғанбыз.