25 ақпанда қазақстандықтарға жағымды жаңалық хабарланды: енді қазақстандықтар жүргізуші куәлігін оның жарамдылық мерзімі аяқталғаннан кейін де eGov.kz порталы және eGov Mobile мобильді қосымшасы арқылы ауыстыра алады.
eGov.kz порталы арқылы қызметті алу үшін:
- порталға кіріп, "Азаматтарға" – "Көлік және коммуникациялар" – "Автомобиль көлігі" бөліміне өту;
- "Жүргізуші куәлігін алу" қызметін таңдау;
- дайын құжатты алу үшін ХҚКО-ны көрсету және фотосуретті жүктеу (фотоға қойылатын талаптармен танысу);
- қолтаңба үлгісін жүктеу және байланыс телефонын енгізу;
- мемлекеттік баж салығын төлеу (1,25 АЕК). Қайта өтінім берген жағдайда "Бұрын төленген" функциясын пайдалануға болады;
- өтінімді қол қоюдың қолжетімді тәсілдерінің бірімен растау.
Қызмет нәтижесі eGov.kz порталындағы Жеке кабинеттегі "Хабарламалар" бөлімінде және eGov Mobile қосымшасындағы "Хабарламалар" – "Жеке кабинет тарихы" бөлімінде көрсетіледі.
Дайын құжатты рәсімдеу кезінде таңдалған ХҚКО-дан, жеке куәлікті ұсыну арқылы, алуға болады.
"Өтінім беру барысында кейбір жағдайларда пайдаланушы құжатының деректері мемлекеттік ақпараттық жүйелерде цифрландырылмаған болуы мүмкін. Мұндай жағдайда тиісті хабарлама көрсетіледі және деректерді жаңарту үшін ХҚКО-ға жеке жүгіну қажет болуы ықтимал",- делінген ақпаратта.
Бұған дейін Тараз тұрғындарына виртуалды шындық арқылы мас күйде көлік жүргізудің салдары көрсетілгенін жазғанбыз.