Президенттің айтуынша, Қазақстанда түбегейлі өзгерістер кезеңі басталды.
"Бәріміз бір ел болып Конституциялық реформаны табысты жүзеге асырдық. Бұл реформаның тарихи мән-мағынасы ерекше. Оның ел дамуына тигізетін ықпалы аса күшті боларына күмән жоқ", – деді Қасым-Жомарт Тоқаев.
Мемлекет басшысы шет елдердің басшылары, саясаткерлер мен сарапшылар Қазақстандағы Конституциялық реформаға зор ықыласпен қарап отырғанын атап өтті. "Олар еліміз Конституцияның мән-мазмұнын жаңаша тұрпатқа өзгертіп, мүлде жаңа ел болғанын айтып жатыр", – деді Президент.
Қасым-Жомарт Тоқаев жалпы халықтық референдумда азаматтардың тарихи таңдау жасағанын, ел қолдауына ие болған нағыз Халық Конституциясы тұғырына қонғанын атап өтті.
"Конституция – мемлекетіміздің болашағына бағдар болатын, ұлттық мақсат-мұратымызды айқындайтын аса маңызды құжат, темірқазық. Мұны бүкіл дүниежүзілік қауымдастық мойындап отыр", – деді мемлекет басшысы.