Прокурор одан күдіктілермен қалай танысқанын сұрады.
"Нақты күнін айта алмаймын. Шамамен 2017-2018 жылдары бір-бірімізді Instagram-да тауып, жазылдық. Сол кезден бастап қарым-қатынасымыз достық сипатта болды. Арнайы сөйлескен емеспіз, тек кейде отрақ жиындарда кездесіп қалатынбыз. Соңғы рет былтыр жазда бизнес курстарын өткізгенде сөйлестік. Нақты айын айта алмаймын", – деді блогер.
Артынша, прокурор курстарды кім әзірлегенін сұрады. Куәгердің айтуынша, оқу материалдарын эксперт әзірлеген, ал Асет Акбар спикер болып, оқытуды ұйымдастырған. Ол өзінің блогер және инфлюенсер екенін, курстар жеке аттарымен шыққанын және оларды сатқанын айтты.
Кейін прокурор лотерея қалай өткенін сұрады. Куәгердің айтуынша, бұл бірінші тәжірибе болған, "Ғажайып алаң" форматы қолданылған. Әрбір қатысушы курсты сатып алғанда оны айналдырып, сыйлық ұтып алуы мүмкін болған. Прокурордың "бұл "сәттілік барабаны" ма?" деген сұрағына куәгер "атауы әртүрлі болғанымен, негізінде солай" деп жауап берді. Сонымен қатар, IT-маман Сұңғат Өтебұлатов лотереяны жасағаны, ал курстарды эксперт Асет Акбар әзірлегені айтылды.
Прокурор курстардың мазмұны туралы не білетінін сұрады.
"Жоқ, көрмедім. Кімнен алғанын білмеймін. Мен өзім оларды қарамадым, тек эксперттің сөздеріне сендім, өйткені ол спикер болып шықты, бізде де, оларда да. Барлық Қытаймен бизнес курстары негізінен ұқсас: қалай тіркелу, маркетплейстерден қалай тапсырыс беру, әмиянды қалай толтыру – бәрі шамамен бірдей. Мен эксперттен сұрадым, өзім салыстырмадым", – деді Justking.
Адвокат Асет Акбармен танысу қашан болғанын сұрады. Куәгер былтыр жазда, оқыту басталар алдында болғанын айтты.
Курстарға қолжетімділік туралы сұраққа куәгер олар тек сатып алғандарға арналғанын, өзіне Жанәбіловтардың курсына қолжетімділік болмағанын айтты.
Адвокат сұрақтарына жауап ретінде ол курстарды сату үшін әкімшілік жауапкершілікке тартылмағанын, бірақ лотерея өткізгені үшін былтыр шамамен бір айдан кейін жауапқа тартылғанын айтты. Дәл күнін атаған жоқ. Сонымен қатар, әкімшілік құқық бұзушылық туралы хабарлама алғаннан кейін курстарды сату тоқтатылғанын атап өтті.
2026 жылғы 18 наурызда блогер-зайыптылар Ерболат Жанәбілов пен Эльмира Төлегенованың ісі бойынша сот отырысында шақыртуларға қарамастан келмеген куәгерлерге сот арқылы жеткізу қолданылатыны шешілді. Бұл – блогерлер Дархан Жолшыбеков пен Нұрбек Нұртазы (Justking).
Еске салсақ, 2025 жылғы 24 тамызда Ойын бизнесін және лотереяны реттеу комитеті әлеуметтік желілерде құнды сыйлықтардың ұтысын өткізген блогерлер Ерболат Жанәбілов пен Эльмира Төлегенованың әрекеттерін лотерея қызметі туралы заңнама талаптарына сәйкестігі тұрғысынан тексеруді бастағаны белгілі болды.
5 қыркүйекте Астананың Мамандандырылған ауданаралық әкімшілік сотында Ерболат Жанәбіловқа қатысты заңсыз лотерея өткізу фактісі бойынша іс қаралды. 15 қыркүйекте Эльмира Төлегеноваға қатысты іс қаралды. Артынша, оларға қатысты материалдар қылмыстық іс қозғау үшін Қаржы мониторингі агенттігіне жіберілді. 16 қазанда Қаржы мониторингі агенттігі блогерлерге қатысты қылмыстық іс қозғалғанын мәлімдеді.