Оқиға туралы алғаш болып әлеуметтік желілерде жазылды. ZTB NEWS Telegram-арнасының мәліметінше, ұшақ екінші айналым жасағаннан кейін аман-есен қонған.
FlyArystan компаниясының баспасөз қызметі Zakon.kz тілшісіне берген мәліметінде, оқиға 2026 жылғы 1 тамызда Алматы – Астана бағыты бойынша қатынаған FS7055 рейсі кезінде болғанын растады.
"Қону кезінде ауа райы жағдайының өзгеруіне байланысты экипаж ұшақты екінші айналымға жіберу туралы шешім қабылдады. Кейін қайта қонуға әрекет жасап, ұшақ Астана әуежайына сәтті қонды", – деп мәлімдеді әуекомпания.
FlyArystan өкілдерінің айтуынша, экипаждың мұндай шешімі нақты ауа райы жағдайын ескере отырып және ең алдымен ұшу қауіпсіздігін қамтамасыз ету мақсатында қабылданған.
Сондай-ақ компания ұшақтың барлық жүйесі қалыпты режимде жұмыс істегенін атап өтті.
"Ұшақтың жұмысына әсер ететін ешқандай техникалық ақау анықталған жоқ. Барлық жүйе штаттық режимде жұмыс істеді", – деп хабарлады FlyArystan баспасөз қызметі.
Сондай-ақ, әуекомпаниясы азаматтық авиацияда қону талаптары толық орындалмаған жағдайда ұшақты екінші айналымға жіберу – қалыпты әрі халықаралық тәжірибеде кеңінен қолданылатын қауіпсіздік шарасы екенін түсіндірді. Мұндай шешім жолаушылар мен экипаждың қауіпсіздігін қамтамасыз ету үшін қабылданады және бұл авиациядағы стандартты рәсімдердің бірі болып саналады.