Өңір басшысы бүгін ел үшін маңызды күн екенін атап өтті. Жаңа Конституция қабылданғаннан кейін қазақстандықтар алғаш рет елдің бір палаталы Парламенті – Құрылтай депутаттарын сайлап жатыр.
Ермағанбет Бөлекпаев әрбір азамат сайлау учаскесіне келіп, өз таңдауын жасау арқылы бұл үдеріске үлес қоса алатынын айтты. Сондай-ақ ол жастарға арнайы үндеу жасап, олардың сайлауға белсенді қатысуы мен азаматтық жауапкершілігінің маңызын атап өтті.
Бүгін Қарағанды облысында 639 сайлау учаскесі жұмыс істеп жатыр. Алғаш рет оның төртеуі тікелей өнеркәсіп кәсіпорындарының аумағында ашылды. Оның екеуі – Qarmet кәсіпорнында, біреуі – Балқаштағы Kazakhmys Smelting кәсіпорнында, тағы біреуі Нұра ауданындағы "Шұбаркөл Көмір" кәсіпорнында орналасқан.
Мұндай мүмкіндік өндіріс қызметкерлеріне жұмыстан қол үзбей, сайлау құқығын жүзеге асыруға жағдай жасайды. Өңірде барлық тұрғынның, соның ішінде сайлау күні жұмыс орнында жүрген азаматтардың да дауыс беруіне қажетті жағдай жасалған.