"Хабар 24" мәліметінше, Италиядағы гастрольдер Римнің Гионе театрында түйінделді. Қорытынды концертте студенттердің симфониялық оркестрі мен оқытушылар құрамының солистері бір сахнада өнер көрсетті. Бұған дейін қазақ өнерпаздары Генуя, Милан және Сан-Ремо көрермендерін шаттыққа бөледі.
"Мен Үкіметке көп рақмет айтамын, біздің Президентімізге көп рақмет. Біздің болашағымыз зор болсын деп бізді шетелге шығарып, әлемге көрсетіп жатыр. Біздің ел үшін, халқымыз үшін бәріміз де істейміз ғой. Италиялық көрерменнің талғамы өте жоғары. Бұл жерде опера әндерін орындау емтихан тапсырғанмен бірдей". Қазақ ұлттық өнер университетінің ректоры Айман Мұсаходжаева
Астаналық солистер – Талғат Мұсабаев, Салтанат Ахметова, Сүндет Байғожин жергілікті меломандарды таңдай қақтырды. Жас әрі хас талант Ержан Максим әйгілі "О сол мио" әнін шырқады. Домбырашылар ансамблі мен халық аспаптарында ойнаған трио кеш көрігін қыздырды.
"Мәдени дипломатияға үлкен үлес қосып отыр. Бұл – біздің Италия мен Қазақстанның қарым-қатынасына өте үлкен көмек. Осылай біз дүниежүзіне Қазақстанды танытамыз. Бұл кезде Қазақстанды Италияға, Рим қаласына танытып отырмыз". Қазақстанның Италиядағы Төтенше және өкілетті елшісі Ерболат Сембаев
Бұл гастрольге 70-ке жуық студент қатысты. Айдар Торыбаев жетекшілік еткен оркестр күрделі әрі жан-жақты қамтылған бағдарлама ұсына білді.
