Ол өзінің instagrm парақшасында домбыраға да билет алғанын айтып бейне жариялады.
"Аты-жөні жоқ, домбыра деп жазылмаған. Айғай-шумен 59 мың теңгеге билет сатып алып өткіздік",- деп наразылығын білдірді халық әртісі.
Сондай-ақ, ол өзінің осындай жағдаймен үшінші рет бетпе-бет келіп тұрғанын атап өтті.
Flyarystan әуекомпаниясы жағдайға түсініктеме берді.
"Бүгін Қазақстан Республикасының халық әртісі Мақпал Жүнісова ұшқан Семей – Алматы бағытындағы KC7152 рейсінде жолаушы кезекті рет музыкалық аспапты тегін тасымалдау мәселесін көтерді",- делінген ақпаратта.
Бұл ретте, әуекомпания музыкалық аспапты ұшақ салонында келесідей түрде тасымалдауға болатындығын атап өтті: қол жүгінде (егер рұқсат етілген өлшемдерге сәйкес келсе*) немесе алдын ала сатып алынған жеке орынға орналастыру арқылы.
"Тегін тасымалдауға болатын ең жоғарғы салмақ – 5 кг. Максималды өлшемдері – 56x23x36 см. Ақылы түрде 10 кг дейін арттыруға болады, бірақ өлшемдері мен саны өзгеріссіз қалады, яғни, бір дана қолжүгінің өлшемі 56x23x36 см-ден аспауы тиіс. Кез келген қолжүгі, оның ішінде музыкалық аспапты қоса алғанда, барлық бөліктерімен (қаптамасы, қапшығы және т.б.) стандартизаторға сәйкес келуі тиіс",- деді Flyarystan.
Музыкалық аспап үшін орын сатып алудың маңызы неде екенін келесідей түсіндірді: Жолаушыларға қамқорлық көрсету (әр жолаушының қолжүгін орналастыруға жеткілікті орын беру құқығы) және музыкалық аспаптың қауіпсіздігін қамтамасыз ету мақсатында, егер аспаптың өлшемдері қолжүгінің өлшемдерінен асып кетсе, оған жақын орынды сатып алу мүмкіндігі ұсынылады.
Қызмет құны ағымдағы қолжетімді тариф бойынша қосымша орын құнына сәйкес анықталады.
Егер қызмет рәсімделмесе, музыкалық аспапты жолжүк бөліміне тапсыру қажет (әуекомпания аспаптың қауіпсіздігіне жауапкершілік алмайды) немесе әуежайдың сақтау камерасында қалдыру керек.
"Лоукостерлердің қолжүктерге қатысты ережелері ұшақ бортында көп жолаушы болғандықтан, әр жолаушының қолжүгін орналастыру мүмкіндігі болуын қамтамасыз ету мақсатында белгіленген. Бұл ережелер әлем бойынша басқа лоукостерлерде де қолданылады",- деп түсіндірді әуекомпания.
Сондай-ақ, әуекомпания өнер өкілдерін құрметтейтіндігін және халқымыз үшін киелі домбыраның құндылығын жоғары бағалайтындығын атап өтті. Дегенмен олардың басты құндылығы — жолаушылардың ұшу кезіндегі жайлылығы мен қауіпсіздігі.
"Әуекомпанияның өкілдері музыкалық аспапқа жақын орын брондап, оны сатып алуды ұсынды. Өнер иесінің қызметті тегін рәсімдеуді талап етуіне қарамастан, нәтижесінде жолаушы билет ақысын төледі".FlyArystan әуекомпаниясының баспасөз қызметі
Бұған дейін халық әртісі "Мақпал Жүнісова күйеуге тиді" деген алып-қашпа сөзді таратқандарға ренішін білдірген болатын.
