Павлодарда пәтерде белгісіз зат жарылды, деп хабарлайды Zakon.kz ҚР ІІМ ТЖК баспасөз қызметіне сілтеме жасап.
6 наурыз күні сағат 14:40 өртке қарсы қызметіне Павлодардағы Мүткенов көшесінде орналасқан бес қабатты тұрғын үйден өрт шыққаны жайлы хабар келіп түсті.
- Бірінші қабатта орналасқан пәтердің ас үй бөлмесінде белгісіз зат жарылып, арты өртке ұласады. Үй заттары мен тұрмыстық заттар отқа оранған. Жалын 8 шаршы метр аумақты шарпып үлгереді. Қызыл жалын сағат 15:01 ауыздықталып, сағат 15:11 толық сөндірілген. Жарылыс болған орында 1983 жылғы ер адамның өлі денесі табылды, сонымен қатар денесін күйік шалған 1986 жылғы ер адам аурухана төсегіне таңылды, - деп хабарлап отыр ТЖК баспасөз қызметі.
ТЖ орнынан өрт сөндіру бөлімшелерінің күшімен 60 адам қауіпсіз жерге шығырылған, оның 15 бала.
Жарылысқа не себеп болғаны анықталып жатыр.