Ведомствоның мәлімдеуінше, 5 маусым күні таңғы сағат 04:00 шамасында Сарыағаш АПБ-ға такси жүргізушілері хабарласып, Қапланбек кентінің жанындағы Шымкент – Шыназ тас жолында 5-6 жастағы адасқан қыз баланың жүргенін хабарлады.
Тәртіп сақшылары жедел түрде оқиға орнына шығып, кішкентай қызды полиция бөліміне жеткізді. Олар бүлдіршінді тамақтандырып, ата-анасы туралы сұрастырып, бірден оның туыстарын іздеуге кірісті.
Кәмелетке толмаған қыздың ата-анасын іздеуге Сарыағаш АПБ-нің жедел уәкілдері мен ювеналды полиция тобының инспекторлары жұмылдырылды. Полиция жақын маңдағы аумақтарды аралап, сол аумақтағы тұрғындарға 6 жасар қыздың суретін жолдады.Түркістан облысы ПД баспасөз қызметі
Нәтижесінде жоғалған қызын суреттен таныған қыздың анасы аудандық полиция бөліміне келді. Белгілі болғандай, кішкентай қыз түнде үйден көшеге шығып, жоғалып кеткен. Полицейлер кішкентай қызды анасына табыстады. Тұрғын сарыағаштық полицейлерге алғысын білдірді.
Қыздың анасына қатысты жиналған іс құжаттар заңды шешім қабылдау үшін Сарыағаш аудандық әкімдігі жанындағы кәмелетке толмағандардың құқықтарын қорғау жөніндегі комиссияға жолданады.
