16 тамыз күні Ақтөбе облысы аумағындағы Ақтөбе – Болгарка – Шұбарқұдық тас жолында жол-көлік оқиғасы болып, салдарынан көлік жүргізушілердің бірі оқиға орнында жан тәсілім етті, тағы төрт адам емдеу мекемесіне жеткізілді, деп хабарлайды Zakon.kz.
«Газель» жүргізушісі Ақтөбе қаласы бағытындағы жолда қарсы қозғалысқа арналған жолаққа шығып кетіп, Темір ауданына бара жатқан Тoyota Camry автокөлігіне соғылды, деп жазды polisia.kz ақпараттық порталы.
ЖКО салдарынан Тoyota Camry автокөлігінің жүргізушісі оқиға орнында қаза тапты, төрт жолаушы Темір аудандық орталық ауруханасына жатқызылды.
Қазір бұл жағдай бойынша ҚР ҚК-нің 345-бабы 3-бөлігі (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) негізінде сотқа дейінгі тергеу амалдары жүріп жатыр.
