Әкімдіктің өкілі Ержан Байтанаевтың хабарына қарағанда, облыстық балалар клиникалық ауруханасында өңір басшысына жан сақтау бөліміндегі бес баланың жағдайы туралы баяндалды. Барлығы ауыр жағдайда.
Үш баланың жағдайы орташа, олар хирургиялық бөлімде ем алып жатыр.
Өңір басшысы балалардың ата-аналарымен кездесіп, зардап шеккендерге жан-жақты медициналық көмек берілетінін және олардың жағдайы тәулік бойы бақылауда екенін айтты.
Ералы Тоғжанов денсаулық сақтау басқармасының басшылығына балаларға жоғары білікті медициналық көмек көрсетуді тапсырды. Қажет болған жағдайда Астанадан мамандар шақырылады.
Еске салайық, 2022 жылғы 17 желтоқсанда Ақтөбе-Болгарка-Шұбарқұдық тасжолында Темір ауданының 32 жастағы тұрғыны басқарған Toyota Estima автокөлігі аударылды.
Автокөлік ішінде 11 адам, оның ішінде 2010-2011 жылдары туған 9 бала болған. Олар Шұбарқұдық ауылынан Ақтөбеге волейболдан жарысқа қатысуға шыққан. Салдарынан 1 бала апат болған жерде көз жұмды, қалған 8-і Ақтөбедегі облыстық балалар ауруханасына жеткізілген. 5 бала мен жаттықтырушы реанимацияда, қалған 3 бала палатада ем алып жатыр. Ал жүргізуші аман-есен, ол қамауға алынған.