Сыбайлас жемқорлыққа қарсы іс-қимыл агенттігі таратқан ақпаратқа сүйенсек, "Әбиев өзінің Youtube-арнасында шындыққа сәйкес келмейтін бейнежазбаларды жою үшін кәсіпкерден аса ірі мөлшерде ақша бопсалаған".
Сондай-ақ 14 желтоқсанда Әбиев 50 миллион теңгемен ұсталып, соттың санкциясымен 2 ай мерзімге қамауға алынғаны жазылды.
"Бұдан басқа, Әбиев мемлекеттік органдар қызметкерлері мен азаматтарды адастыру мақсатында "Сыбайлас жемқорлыққа қарсы күрес департаменті" ЖШС жеке заңды тұлғасын тіркегені анықталды. Өзін осы ұйымның басшысымын деп таныстыра отырып, Әбиев кәсіпкерлер мен мемлекеттік органдардың лауазымды адамдарынан өзінің жеке мүддесі үшін іс-әрекеттер жасауды, сондай-ақ заңда белгіленген тәртіпті бұза отырып ақпарат пен материалдар беруді талап етті".Сыбайлас жемқорлыққа қарсы іс-қимыл агенттігінің баспасөз қызметі
"Әбиевтің қызметі құқық қорғау органдарының жұмысына еш қатысы жоқ. Әбиевтің басқа да осыған ұқсас қылмыстарға қатысы туралы ақпарат тексеріледі" – делінген хабарламада.
Агенттік өкілдері Әбиевтің заңсыз қызметінің барлық осындай фактілері туралы Сыбайлас жемқорлыққа қарсы қызметке 1424 нөмірі бойынша хабарлауға болатынын ескертті.
ҚР ҚПК-нің 201-бабына сәйкес өзге ақпарат жария етуге жатпайды.