Есентай өзені арқылы өтетін 8 жолақты көпірдің құрылысы аяқталуға жақын. Әлі атқарылатын жұмыс бар, бірақ қазірдің өзінде көлік жүргізуге болады. Жол жөндеу 2023 жылға жоспарланған жұмыстар аясында жүргізіліп жатқаны айтылды.
Бұған дейін хабарлағанымыздай, әл-Фараби даңғылындағы Есентай өзені арқылы өтетін көпір түнде жөндеу аясында жабылған.
"31 тамыз сағат 23:00-ден 1 қыркүйек сағат 06:00-ге дейін қолайлы ауа райы жағдайында Сейфуллин даңғылынан Жароков көшесіне дейін даңғылдың қозғалысын толығымен жауып, жол жамылғысының үстіңгі қабаты төселеді. Қозғалыс Сейфуллин, Назарбаев, Достық, Тимирязев, Жароков, Ерғожин, Розыбакиев және Мұстафин көшелері арқылы жасалады", - делінген әкімдік хабарламасында.
Биыл шілде айында техникалық сараптама қорытындысы негізінде Есентай өзені арқылы өтетін көпірдің апатты жағдайына байланысты қайта жөндеу басталды. Көпірді қайта жаңғырту аясында арқанды нығайту, ескіні бөлшектеу және 96 жаңа аралық тақталарды орнату, гидрооқшаулау, асфальтбетон жабынының төменгі қабатын төсеу жүргізілді.
Бұған дейін Алматыда Байзақов көшесі жөндеуге жабылатыны хабарланған еді.