Маңғыстау облысы прокуратурасының 2023 жылғы 23 қараша күнгі мәліметі бойынша, 2022 жылы облыстық кәмелетке толмағандарды бейімдеу орталығының бұрынғы директоры өзінің тумаластарын жұмысқа заңсыз орналастырып, олардың шоттарына 2,6 млн теңге аударған. Туыстары іс жүзінде жұмыс істемеген, дегенмен ай сайын жалақысы төленіп, негізсіз сыйақылар есептеліп отырған.
"Бұрынғы директордың іс-әрекетінде бюджет қаражатын жымқыру қылмыстық құқық бұзушылық құрамының байқалуына байланысты, прокурорламен ҚР ҚК-нің 189-бабы 3-бөлігінің 2)тармақшасында көзделген сотқа дейінгі тергеп-тексеру басталды", – делінген облыстық прокуратура таратқан хабарламада.
Тергеу іс-құжаттары Сыбайлас жемқорлыққа қарсы іс-қимыл агенттігінің Маңғыстау облысы бойынша департаментіне жолданды.
Қадағалаушы орган бұған қоса, басқа да анықталған заңдылықтың бұзылулары бойынша прокурорлық қадағалау актілері енгізіліп, 2 мекеме директорына 7 әкімшілік іс-құжаттары толтырылғанын мәлімдеді.