Аудан әкімі Ардақ Смайылов өз мәлімдемесінде жергілікті халықты қалыптасқан су тасқыны жағдайынан хабардар етті. Аудан әкімі су тасқынынан болатын залалды жою және оны азайтумен айналысатын комиссия құрылғанын атап өтті.
"Бүгінде зардап шеккен адамдарға материалдық көмек көрсету үшін барлық үйлерге тексеру жүргізу мақсатында комиссия құрылды", – деді аудан әкімі Ардақ Смайылов.
Әкімнің айтуынша, бірнеше ай ішінде су тасқыны алдындағы кезеңге дайындық бойынша үлкен жұмыстар атқарылды. Су басу қаупі төнген ауылдар азық-түлікпен, дәрі-дәрмектермен қамтамасыз етілді.
Зардап шеккендерге көмек көрсету бойынша жедел іс-шараларды атқаруға жергілікті атқарушы органдардың, сондай-ақ өңірдің ТЖД бөлімшелерінің күштері мен құралдары тартылды. Су басқан үйлердегі барлық тұрғын эвакуацияланды.
Айта кетсек, 10 сәуірде түстен кейін Бурабай ауданындағы Қаражар бөгеті бұзылып, Купчановка, Вознесенка, Капитоновка және Журавлевка ауылдарын су басты.