15 сәуірде патрульдік полиция батальонының инспекторлары Дәулет Сағынбаев пен Нұрғали Сапархан жас жігітті ажалдан арашалап қалғаны хабарланды. Республикалық маңызы бар Сарыағаш – Жетісай – Жібек Жолы тасжолының 155-130 шақырымында кезекшілікке түскен полицейлер күндізгі уақытта жол бойында адамдардың көмек сұрап тұрғанын байқайды. Тәртіп сақшылары мән-жайды анықтағанында Сырдария өзенінде ағып бара жатқан адамды көреді.
"Еш ойланбастан полицей Сағынбаев суға секіріп, батып бара жатқан азаматқа жақындайды. Содан әріптесі Сапархан екеуі ер адамды сүйреп, жағаға алып шығады", делінген хабарламада.
Белгілі болғандай, Мақтаарал ауданының тұрғыны мал бағып жүріп, құлынның өзенге түсіп кеткенін байқайды. Малын құтқарамын деп суға түсіп, соңында өзі шыға алмай қалған. Қазіргі таңда полицейлердің жылдам әрекеті арқасында аман қалған тұрғынның жағдайы қалыпты.
