БАҚ өкілдері: "Егер адамдар сенімхаттарды онлайн рәсімдеу мүмкіндігіне ие болса, нотариустардың табысы төмендеп кетпейді ме" деп министрден сұрады.
"Бұдан нотариустардың табысы төмендемейді. Олардың қызметтерінің құны сол күйі сақталып қалады және оларға жүгінген азаматтар осы қызметтің құнын банктердің интернеттегі қосымшалары арқылы онлайн төлейтін болады. Ақиқатында, нотариустар өз жұмысын бәз-баяғыша атқара береді, қызметтері үшін де ақы алады, бұл арада тек адамдар оларға барып жатпайды, барлық процесті онлайн атқарады", – деді министр.
Оның айтуынша, "е-нотариат" пилоттық жобасы нотариустарға да, халыққа да тиімді. Адамдар шетелде жүріп немесе үйінде отырып, eGov mobile арқылы нотариаттық сенімхат алу мүмкіндігіне ие болады.
Бұған дейін Әділет министрлігі ЦДИАӨМ-мен бірлесіп "е-нотариат" пилоттық жобасының іске қосылғанын хабарлаған болатын. Бұл қазақстандықтарға сенімхаттардың кейбір түрлерін үйден шықпай-ақ онлайн рәсімдеуге мүмкіндік береді.